මේ මගේ අන්තිම නාට්‍යයයි - නාමෙල් වීරමුණි

Author: චන්දන ජයවීර Source: Dinamina Date: 07/08/2009

70’ දශකයේ ජනප්‍රිය නාට්‍යයක් වූ නාමෙල් වීරමුනිගේ ‘නැට්ටුක්කාරී’ නාට්‍යයේ නව නිෂ්පාදනයක් අගෝස්තු මස 14 සිට 16 දක්වා සවස 6.30ට බොරැල්ල නාමෙල් මාලනි පුංචි රඟහලේ දී වේදිකාගත වේ. ප්‍රංශ ජාතික ශ්‍රේෂ්ඨ නාට්‍යකරුවෙක් වූ ෂොන් අනුයිගේ Colombe නාට්‍ය ඇසුරෙන් නිෂ්පාදිත ‘නැට්ටුක්කාරී’ නව නිෂ්පාදනය සඳහා රංගනයෙන් මාලනී වීරමුනි, රුවන් වික්‍රමසිංහ, දයා තෙන්නකෝන්, සුරංගි කෝසලා, දීපානී සිල්වා, අනුෂා දිසානායක සහ සැනට් දික්කුඹුර, සංගීතයෙන් ජයතිස්ස අලහකෝන් හා රංගාලෝකයෙන් ප්‍රභාත් මනෝහර හා වේදිකා පරිපාලනයෙන් ජී. එල්. සමන්ත හා ඇඳුම් නිර්මාණයෙන් මානෙල් වීරමුණි සම්බන්ධ වෙනවා.

* ඔබ කියවා ඇති නාට්‍ය පිටපත් අතරින් ෂොන් අනුයිගේ මෙම නාට්‍යය පිටපත කෙරෙහි ඔබේ අවධානය යොමු වුණේ ඇයි?

නාට්‍යය නිෂ්පාදකවරයෙක් නිෂ්පාදනය සඳහා නාට්‍යයක් තෝරා ගැනීමට පෙර පිටපත් සිය ගණනක් කියවනවා. එහිදී ඔහු නාට්‍යයේ ආත්මය පිළිබඳව අවධානය යොමු කරනවා. නාට්‍ය රසිකයාට රසයක් ලබා දිය හැකි යමක් ඒ තුළ තිබෙනවාද කියා මා බලනවා. මෙම නාට්‍යය පිටපත තුළ එවැනි අනර්ග ගණයේ නාට්‍යයක් තිබෙන බව මට පෙනී ගියා.

මෙහි භාෂාවත් අවස්ථා සම්බන්ධයත් නාට්‍යය හා තදින් බැඳී තිබෙනව. විශ්ව සාධාරණ හැඟීමක් ඉතා කදිමට ෂොන් අනුයි මෙම නාට්‍ය පිටපත තුළදී විදාරණය කරනවා. නිෂ්පාදිත මෙම “නැට්ටුක්කාරී’ නාට්‍යය මගේ නාට්‍යය අතරින් ඉතාම සාර්ථකම නාට්‍යය ලෙස එවකට විචාරකයන් හැඳින්වූවා.

* මෙම නාට්‍යයේ තේමාව හා පසුබිම කෙබඳුද?

18 වන ශතවර්ෂයේ අගභාගයේ ප්‍රංශයේ සිටි සුප්‍රකට රංගන ශිල්පිනියක් වූ සේරා බර්නාඩ්ගේ චරිතය පදනම් කරගෙන ෂොන් අනුයි මෙම නාට්‍යය රචනා කරන්නට ඇතැයි විශ්වාසයක් තිබෙනවා. මෙම නිළිය සමථ, නාට්‍ය ලෝකයම සිය විශිෂ්ඨ රංගන පෞර්ෂය තුළින් තම වසඟයට ගත්තා.

නැට්ටුක්කාරී නාට්‍යයේ කතා තේමාව ගත්තොත් එහි ප්‍රධාන චරිතය වන ජූලියන් තම මවගේ කෲරතර ගුණාංගවලට එරෙහිව ක්‍රියාකරන සදාචාරය පතන විප්ලවවාදී තරුණයෙක්. ඔහු මවගේ ආදරය නොලැබූ දළ දඬු ගති සිරිත් ඇත්තෙක්.

ඔහුගේ බිරිඳ වන කොලොම්බි ඔහුට වඩා හාත්පසින්ම වෙනස් උණුසුම් චරිතයක්. ඇය ඔහුගේ සහෝදරයා වන පෝල් හා පරදාර සේවනයේ යෙදෙනවා. මෙම චරිත හරහා ගොඩනැගුණු සර්වකාලීන මානුෂික ගුණයක් නැට්ටුක්කාරී තුළ අන්තර්ගත වෙනවා.

* ඔබ නළුවෙක් වගේම නාට්‍ය නිෂ්පාදකවරයෙක්, ඒ අනුව ඔබ සිතන්නේ නාට්‍ය කාගේ කලාවක් කියලා ද?

මිනිසුන් නළු නිළියන් වේදිකාව මත රූපවාහිනිය මත සිනමාව මත රංගනයෙහි යෙදෙනවා දකින්න කැමතියි. ඒ අනුව ඔවුන්ට තම රංගනයන් වෙත සුවිශේෂ ඉල්ලුමක් ගොඩනඟා ගෙන තිබෙනව. නමුත් ඔවුන්ට කිසිවිටෙකත් වේදිකාව පාලනය කළ හැකි වී නැහැ.

වේදිකාව නළුවන්ගේ හා නිෂ්පාදකගේ සංකලනයක්. නාට්‍යය නිෂ්පාදකයෙක් අරමුණක් සහිතව රංගය ඉදිරියට මෙහෙය වනවා. නළු නිළියන්ට පිටපත පිළිබඳව විවිධ අදහස් තිබිය හැකියි. එම අදහස් සහ ප්‍රතිභාව යොදාගෙන අරමුණ කරා ඔවුන් රැගෙන යාම නිෂ්පාදකගේ් කාර්යක්.

මම නිෂ්පාදකවරයෙක් හැටියට නළුවන්ට සහ නිළියන්ට විශාල නිදහසක් ලබා දෙනවා. නමුත් ඒ අතරම දරුණු ආඥාදායකයෙක් ද වෙනවා. මට උවමනා දෙය කෙසේ හෝ නළුවන්ගෙන් උකහා ගැනීම මෙහිදී මම උත්සාහ කරනවා. මගේ විග්‍රහයට අනුව වචන අර්ථානුකූලව ප්‍රකාශ කිරීම රංගනයේදී වැදගත්.

* එක් නාට්‍යය පිටපතක් ආශ්‍රයෙන් නිෂ්පාදන කිහිපයක් බිහිවීම නාට්‍ය නිෂ්පාදකයෙක් හැටියට ඔබ දකින්නේ කොහොමද?

වෙනත් නිෂ්පාදකයෙක් නාට්‍ය දෙස වෙනත් ආකාරයකට දැකිය හැකියි. නළුවොත් නිළියොත් නාට්‍ය දෙස බලන්නේ ඔවුනගේම වූ ආකාරයකටයි. මම දකින්නේ මා ගොඩනඟාගත් අවධානාත්මක ශෛලියට අනුවයි. ඉන් අදහස් වන්නේ විශේෂයෙන්ම රචනයේ එන මූලික අර්ථයට අනුව රඟපෑම.

මෙහිදී රචකයාට සාධාරණයක් ඉටු කරන අතරම නාට්‍ය නිෂ්පාදකයෙක් විදිහට මගේ දැක්ම ඔහුට වඩා වෙනස්. මම ධර්මසේන පතිරාජගේ ‘කොරා සහ අන්ධයා’ නාට්‍යයෙ නිෂ්පාදනය කිරීමේ දී ඊට වෙනමම අර්ථ කථනයක් දුන්නා.

* 70 දශකයෙන් මෙපිට සාර්ථක නවකතාවක්, කවියක්, නාට්‍යයක් බිහිවී නැතැයි බොහෝවිට ප්‍රවීණ වයෝවෘධ විචාරකයන් කියනවා. වර්තමානයේ තරුණයන් සමඟ ගැටෙන ප්‍රවීණයෙක් හැටියට මෙම තත්ත්වය ඔබ දකින්නේ කොහොමද?

මම නිතරම තරුණයන්ගේ නාට්‍යය බලනවා. අදටත් මම ඒවා පිළිබඳව පුවත්පත්වලට ලියනවා. නමුත් ඔය කියන තරුණයන්ගෙන් කීයෙන් කීදෙනෙක් අනෙක් අයගේ නාට්‍ය බලන්න යනවාද? මම නැවත ලංකාවට පැමිණීමෙන් පසු නාට්‍ය 6ක් කළා.

නාට්‍ය කලාව වෙනුවෙන් ඉමහත් කැපවීමෙන් රඟහලක් පවත්වාගෙන යනවා. නමුත් ඔය කියන තරුණ නාට්‍යකරුවන් අතරින් මගේ නාට්‍යයක් බලන්න ආවේ එම්. සෆීර් හා බුද්ධික දමයන්ත පමණයි.

* ඔබ පරම්පරා කිහිපයක රංගන ශිල්පීන් සමඟ ගනුදෙනු කර තිබෙනවා. වර්තමාන පරම්පරාව ගැන ඔබේ අත්දැකීම කෙබඳු ද?

එම ගනුදෙනුව නිසා මම තීරණයක් අරන් තිබෙනවා, මින් මතුවට නාට්‍යයක් නොකරන්න. මෙය මගේ අවසාන නාට්‍යයයි. අද නළුවන් රූපවාහිනියට ඇබ්බැහි වෙලා. පුහුණුවීම් මඟ හරිනවා.

නැට්ටුක්කාරී නව නිෂ්පාදනයේ මේ වන විට නළුවන් හය දෙනෙක් ඉවත් කර තිබෙනවා. පුහුණුවීම්වලට නොඑන නළුවන් නාට්‍යය තුළ තබා ගැනීමෙන් වැඩක් නැහැ. නාට්‍ය නිෂ්පාදනය අබින් කෑමක්. නමුත් මම තීරණයක් අරන් තිබෙනවා, මින් පසුව නාට්‍යය නොකරන්න.